Útvarpsþættir ungmenna um Barnasáttmálann
Umboðsmaður barna vill vekja athygli á frábæru framtaki RUV, UNICEF og tíu ungmenna.
Tíu ungmenni hvaðanæva að af landinu munu í dag og næstu 11 fimmtudaga fjalla um Barnasáttmála Sameinuðu þjóðanna í nýjum útvarpsþáttum sem hefja göngu sína á Rás 1 kl. 15:25 í dag. Í ár er þvi fagnað að tuttugu ár eru frá því að þessi mikilvægi mannréttindasáttmáli var samþykktur á allsherjarþingi Sameinuðu þjóðanna.
Ungmennin eru á aldrinum 14-16 ára. Í þáttunum munu þau fjalla um áhrif og þýðingu Barnasáttmálans fyrir börn heimsins og spjalla við fjölmarga aðila á öllum aldri um mismunandi ákvæði sáttmálans og fjölbreytt málefni sem þeim tengjast. Þættirnir eru samstarfsverkefni Ríkisútvarpsins, Barnahjálpar Sameinuðu þjóðanna (UNICEF) og dagskrárgerðarfólksins unga.
-
Eiga börn og ungmenni rétt á einkalífi?
-
Mega börn láta skoðanir sínar í ljós í opinberum málum?
-
Hvað er barnaþrælkun?
-
Eiga börn rétt á að leika sér og hvíla sig?
-
Má ráða því hvort maður gengur í skóla?
Leitað verður svara við þessum spurningum og ótal fleiri í þáttunum sem verða á dagskrá á hverjum fimmtudegi fram að jólum, frá klukkan 15:25, og eru síðan endurteknir á laugardögum klukkan 20:40.