Umboðsmaður barna heimsækir lögreglustjóra
Umboðsmaður barna, Salvör Nordal, heimsótti lögreglustjórann á höfuðborgarsvæðinu þann 20. febrúar ásamt lögfræðingum embættisins, Guðríði Bolladóttur og Stellu Hallsdóttur.
Sérstaklega var farið yfir mál er varðar yfirmann á skammtímaheimili á vegum Barnaverndar Reykjavíkur sem hefur verið áberandi í fjölmiðlum nýlega. Þá voru verkferlar innan lögreglunnar ræddir sem og upplýsingagjöf á milli stofnanna. Einnig var rætt um mikilvægi forvarnarstarfs og skýrslutökur af börnum ásamt öðrum málum er snúa að börnum og ungmennum.
Umboðsmaður barna var ánægður með fundinn og væntir góðs samstarfs við embætti lögreglustjórans á höfuðborgarsvæðinu í framtíðinni.