8. september 2023

Samráð vegna sameiningar MA og VMA

Umboðsmaður barna hefur sent bréf til mennta- og barnamálaráðherra vegna sameiningar Menntaskólans á Akureyri og Verkmenntaskóla Akureyrar. Þar kemur fram að umboðsmanni barna hafi borist erindi frá fulltrúum nemenda við Menntaskólann á Akureyri þar sem nemendur lýsa yfir óánægju sinni með skort á samráði við nemendur vegna sameiningar MA og VMA. 

Í bréfi umboðsmanns kemur fram að mat á því sem er börnum fyrir bestu eigi ávallt að liggja til grundvallar ákvarðanatöku af hálfu hins opinbera og að slíkt mat eigi að framkvæma áður en ráðist er í aðgerðir sem varða börn með einum eða öðrum hætti. Jafnframt kemur fram að hluti af slíku mati sé að veita börnum tækifæri til þess að koma sjónarmiðum sínum á framfæri og að réttmætt tillit sé tekið til skoðana þeirra. 

Börn eiga rétt á að koma sínum sjónarmiðum á framfæri

Það er réttur barna að vera höfð með í ráðum við skipulag menntunar og skylda stjórnvalda að veita þeim raunverulega tækifæri til þess að koma sjónarmiðum sínum á framfæri og hafa áhrif. Þá óskaði umboðsmaður eftir upplýsingum um það hvort mat hafi verið lagt á bestu hagsmuni barna við ákvarðanatöku um sameiningu Menntaskólans á Akureyri og Verkmenntaskóla Akureyrar. Hvort nemendur hafi fengið tækifæri til þess að koma sjónarmiðum sínum á framfæri og hvort samráð hafi verið haft við nemendur og þá með hvaða hætti. 

Bréf umboðsmanns barna til mennta- og barnamálaráðherra

Uppfært 27. september 2023

Ekkert svar hefur borist frá ráðuneytinu og því hefur embættið ítrekað bréf sitt til mennta- og barnamálaráðherra með ósk um að erindinu verði svarað eins fljótt og auðið er.