Málþing um áhrif skilnaðar á börn
Málþingið Áfram ábyrg - áhrif skilnaðar á börn og leiðir til úrbóta verður haldið í Kirkjulundi í Reykjanesbæ 23. febrúar 2007, kl. 9:30 - 16.
Málþingið er samvinnuverkefni Fjölskyldu- og félagsþjónustu Reykjanesbæjar, Keflavíkurkirkju og Kjalarnessprófastsdæmis. Tilgangur þess er að varpa ljósi á og skapa umræður um vanda þann sem steðjar að börnum í skilnaðarmálum og leita leiða til þess að bregðast við honum.
Skv. tölum Hagstofu Íslands snertir málefnið um 1100 - 1200 börn árlega , þ.e. í kringum 700 barnafjölskyldur á ári. Markmið ráðstefnunnar er að varpa ljósi á og skapa umræður um þann vanda sem steðjar að börnum í skilnaðarmálum og leita leiða til þess að bregðast við honum.
Á málþinginu kemur saman fagfólk sem vinnur með fjölskyldur og börn í þessum aðstæðum og nýjustu rannsóknir verða kynntar. Aðalfyrirlesarar eru þær Erika Beckmann sálfræðingur og forstöðumaður fjölskylduþjónustu lúthersku kirkjunnar í Marburg í Þýskalandi og dr. Sigrún Júlíusdóttir professor í félagsráðgjöf.
Aðrir fyrirlesarar eru: Thomas Mainz, sálfræðingur og samstarfsmaður Eriku Beckmann; Álfgeir Logi Kristjánsson, aðjúkt við KHÍ og Lýðheilsudeild HR, Benedikt Jóhannsson, sálfræðingur og starfsmaður Fjölskylduþjónustu kirkjunnar; Ingibjörg Bjarnadóttir hdl og umsjónarmaður Sáttamiðlunar og Valgerður Halldórsdóttir, kennari og félagsráðgjafi MA og formaður Félags stjúpfjölskyldna.
Pallborðsumræður verða í lok ráðstefnunnar. Þá flytur Edda Björgvinsdóttir, leikkona, þætti úr leikritinu, Alveg BRILLJANT skilnaður.
Laugardaginn 24. febrúar frá kl. 10-12:30 verða myndaðir vinnuhópar undir stjórn Eriku Beckmann og Thomas Mainz undir yfirskriftinni Úrræði í málefnum skilnaðarbarna.