Logo Umboðsmanns barna
English Danish Russian Thai Polish

Könnun um skólaforðun

Velferðarvaktin kynnti nýlega niðurstöður könnunar um skólasókn og skólaforðun í grunnskólum landsins. Nánar er fjallað um niðurstöður könnunarinnar á vefsvæði Velferðarvaktarinnar en könnunin var framkvæmd í þeim tilgangi að afla upplýsinga frá skólastjórnendum sem nýst geta við stefnumótun í málefnum barna. Umboðsmaður barna telur niðurstöður könnunarinnar vera mikilvægt innlegg í umræðuna um stöðu barna í íslensku samfélagi enda hefur skort upplýsingar um umfang þessa vanda eins og kom fram í bréfi embættisins 19. mars 2018 til menntamálaráðherra, formanns sambands íslenskra sveitarfélaga og forstjóra Menntamálastofnunar.

Könnun Velferðarvaktarinnar leiðir meðal annars í ljós að gera má ráð fyrir að um 1.000 börn á grunnskólaaldri glími við skólaforðun eða um 2,2% nemenda. Meðal helstu ástæðna skólaforðunar nefna skólastjórnendur andlega vanlíðan nemenda eins og kvíða og þunglyndi og erfiðar aðstæður á heimilum þeirra.

Umboðsmaður barna vill árétta að börn eiga rétt á menntun og viðeigandi skólagöngu og tryggja þarf þeim börnum sem glíma við skólaforðun stuðning við hæfi enda er farsæl skólaganga lykilatriði fyrir velferð og framtíðarhorfur barna. Ljóst er að skólaforðun í grunnskóla er meðal þeirra atriða sem auka líkurnar á brotthvarfi nemenda úr framhaldsskóla og þá sýna rannsóknir að hagir og líðan ungmenna utan skóla eru lakari en þeirra sem eru í námi. Samkvæmt upplýsingum umboðsmanns barna eru jafnframt dæmi um börn á skólaskyldualdri sem eru alfarið utan skóla en slíkar aðstæður kalla á skjót viðbrögð og virkt samstarf aðila í nærumhverfi barns.

Að mati umboðsmanns er þörf á samræmdum viðmiðum um fjarvistarskráningar nemenda í grunnskólum til þess að fá nauðsynlegar upplýsingar um eðli og umfang vandans. Einnig þarf að efla stuðningsþjónustu innan skóla, tryggja þarf börnum í þessari stöðu nauðsynlega félags- og heilbrigðisþjónustu, og efla þarf stuðning við foreldra og heimili þeirra barna sem sækja ekki skóla vegna vanlíðunar eða heimilisaðstæðna.

Hér er hlekkur á umfjöllun RÚV um könnunina þar sem rætt er m.a. við Salvöru Nordal, umboðsmann barna og Þorstein Sæberg, formann Skólastjórafélags Íslands

Hér má lesa bréf sem embættið sendi til menntamálaráðherra vegna barna á skólaskylduári utan skóla þar sem lýst var áhyggjum af þeim málum

 

Mynd: Yadid Levy / Norden.org

Mynd: Yadid Levy / Norden.org