Logo Umboðsmanns barna
English Danish Russian Thai Polish

Umræða um fækkun kennsludaga í grunnskólum

Umboðsmaður barna hefur ritað menntamálaráðherra og Sambandi íslenskra sveitarfélaga bréf vegna umræðu um fækkun kennsludaga í grunnskólum. Í bréfi sínu ítrekar umboðsmaður að börn og ungmenni eru viðkvæmur þjóðfélagashópur sem þarfnast sérstakrar verndar og umönnunar umfram aðra þjóðfélagsþegna. Í þeim efnahagsþrengingum sem nú eru er mikilvægt að huga vel að börnum og aðstæðum þeirra og reyna þarf eftir fremsta megni að koma í veg fyrir að þrengingar í efnahagslífinu hafi áhrif á daglegt líf þeirra, svo sem skólagöngu. Skólinn gegnir mikilvægu hlutverki og er ákveðin kjölfesta í lífi barna og ungmenna. Kjölfesta sem ekki síst er mikilvæg fyrir börn og ungmenni á þeim umrótartímum sem við upplifum núna.

Sem opinber talsmaður allra barna á Íslandi hvetur umboðsmaður barna menntamálaráðherra og Samband íslenskra sveitarfélaga til að íhuga allar hliðar málsins vel áður en ákveðið er að fækka kennsludögum í grunnskólum. Mikilvægt er að hagsmunir barna séu ávallt hafðir í fyrirrúmi og börnum eftir fremsta megni hlíft við hvers kyns niðurskurði sem sveitarfélögin standa frammi fyrir vegna efnahagsástandsins.

Bréf umboðsmanns barna má lesa í heild sinni hér.