Samantekt um nýafstaðnar krakkakosningar
Börn eiga rétt á því að láta í ljós skoðanir sínar og hafa áhrif á samfélagið. Það kemur meðal annars fram í samningi Sameinuðu þjóðanna um réttindi barnsins, sbr. lög nr. 19/2013.
Í aðdraganda forsetakosninganna 25. júní sl. stóðu KrakkaRÚV og umboðsmaður barna fyrir forsetakosningum barna til þess að gefa börnum tækifæri á því að láta skoðanir sínar á frambjóðendum í ljós.
Öllum bekkjum í öllum skólum landsins var boðið að taka þátt og tóku tæplega 2.500 börn þátt, sem eru yfir 5% barna á grunnskólaaldri. Auk þess að senda bréf til skólanna var verkefnið kynnt með sýningu á þessu myndbandi.
Leiðbeiningar um verkefnið og kynningarefni var sett á vef KrakkaRúv og var umboðsmaður barna í sambandi við þá kennara sem vantaði frekari upplýsingar eða ráð.
Allir frambjóðendur útbjuggu um 60 sekúndna myndband til þess að kynna sig og sína stefnu, ásamt því að svara nokkrum spurningum frá ráðgjafarhópi umboðsmanns barna. Myndböndin voru svo sýnd í skólum, ásamt kynningarmyndbandi á forsetaembættinu. Í framhaldi af því fengu börnin tækifæri til að kjósa sinn frambjóðanda á sérstökum eyðublöðum sem var skilað í sérstaka vefgátt hjá KrakkaRÚV.
Þórhildur Elínardóttir Magnúsdóttir sem er í ráðgjafarhópi umboðsmanns barna og Ísgerður Elfa Gunnarsdóttir hjá KrakkaRÚV kynntu svo niðurstöður krakkakosninganna á kosningavöku RÚV. Guðni Th. Jóhannesson bar þar sigur úr býtum eins og meðfylgjandi mynd sýnir.
Umboðsmaður barna þakkar þátttakendum og KrakkaRÚV frábært samstarf.