Krakkakosningar að baki
Eitt af þeim verkefnum sem umboðsmaður barna er hvað stoltastur af eru Krakkakosningar sem er samstarfsverkefni embættisins og KrakkaRÚV. Krakkakosningar fóru fyrst fram í tengslum við forsetakosningarnar í júní 2016 og svo aftur í kringum Alþingiskosningarnar sem fram fóru 29. október sl. 
Í Krakkakosningum til Alþingis tóku um 2.700 krakkar í 56 grunnskólum þátt í verkefninu og voru niðurstöðurnar kynntar á kosningavöku RÚV á kosningadegi. Helstu niðurstöður eru þær að Sjálfstæðisflokkurinn naut mesta fylgis meðal krakkanna með 24,3 prósent atkvæða og 21 þingsæti. Þar næst komu Píratar með 15,1 prósent og ellefu þingsæti og á eftir þeim Alþýðufylkingin með 13,5 prósent og tíu þingsæti. Það er nokkuð frábrugðið hinu hefðbundnu kosningum fullorðinna því þar var Alþýðufylkingin mjög fjarri því að ná manni á þing.
Vinstrihreyfingin - Grænt framboð fékk 10,5 prósent atkvæða samkvæmt niðurstöðum Krakkakosninga og sjö þingsæti. Björt framtíð er með 8,5 prósent og 6 þingsæti og Dögun og Framsóknarflokkurinn með fjögur þingsæti hvor og báðir með um 6,1 prósent atkvæða.
Aðrir flokkar ná ekki fólki á þing en það eru Viðreisn með 4,4 prósent atkvæða, Flokkur fólksins með 3,5 prósent, Samfylkingin með 3,0 prósent, Íslenska þjóðfylkingin með 2,5 prósent og Húmanistaflokkurinn með 2,4 prósent atkvæða.