Göngum í skólann
Í þessari viku hófst formlega verkefnið Göngum í skólann sem stendur út októbermánuð. Verkefninu er ætlað að hvetja nemendur, foreldra og starfsmenn skóla til að ganga, hjóla, fara á línuskautum eða á annan virkan hátt til og frá skóla.
Ísland tekur nú í fyrsta skipti þátt í Göngum í skólann-verkefninu en á en árinu 2006 tóku milljónir barna þátt í verkefninu í fjörutíu löndum víðs vegar um heim.
Bakhjarlar Göngum í skólann-verkefnisins eru Lýðheilsustöð, Umferðarstofa (ásamt móðurskólum í umferðarfræðslu), Ríkislögreglustjórinn, Menntamálaráðuneytið, Slysavarnafélagið Landsbjörg, Íþrótta- og Ólympíusamband Íslands og Heimili og skóli.
Í októbermánuði, ár hvert, eru börn hvött sérstaklega til að nýta sér virkan samgöngumáta, svo sem göngu, til að ferðast til og frá skóla. Markmið verkefnisins eru meðal annars:
- Að hvetja til aukinnar hreyfingar með því að auka færni barna til að ganga á öruggan hátt í skólann og fræða þau um ávinning reglulegrar hreyfingar.
- Heilbrigður lífsstíll fyrir alla fjölskylduna. Hreyfing vinnur gegn hjartasjúkdómum, offitu og sykursýki II og stuðlar að streitulosun, betri sjálfsmynd, o.fl.
- Að draga úr umferðarþunga, mengun og hraðakstri nálægt skólum. Betra og hreinna loft og öruggari og friðsælli götur og hverfi.
- Vitundarvakning um ferðamáta og umhverfismál. Hversu ,,gönguvænt“ umhverfið er og hvar úrbóta er þörf? Samfélagsvitund eykst.
- Að kenna börnum reglur um öryggi á göngu og hjóli.
Sjá nánar á www.gongumiskolann.is.