Ný sambönd foreldra

Breytt hlutverk
Gott að hafa í huga
Meiri upplýsingar
Aðstoð og ráðgjöf í boði

Breytt hlutverk
Stór hluti einstæðra og fráskilinna foreldra eignast nýjan maka innan fárra ára frá skilnaði eða sambúðarslitum. Þá eignast börnin stjúpforeldri en það getur haft ýmsar flækjur í för með sér. Börnin eignast þá kannski líka stjúpsystkini, hálfsystkini, nýjar „frænkur“, „frændur“, „ömmur“ og „afa“. Stundum rofna tengslin við ættingja sem áður voru daglegir gestir. Það getur verið erfitt og óþægilegt fyrir alla í fjölskyldunni þegar kemur að því að foreldrar hefja ný sambönd. Samband barns við kynforeldrið breytist sem og hlutverk barnsins í fjölskyldunni. Stundum reynir þetta líka á umgengni við burtflutta foreldrið.

Gott að hafa í huga
Hér eru nokkrir punktar sem er gott að hafa í huga 

• Það er eðlilegt að börnum líki ekki vel við stjúpforeldrið í fyrstu en nauðsynlegt er að gefa öllum tækifæri til að kynnast og venjast. Stjúpforeldri sem þekkir ekki stjúpbarn sitt er eðlilega óöruggt í fyrstu þótt það sé allt af vilja gert til að eiga góð samskipti við barnið. Þetta tekur allt tíma.

• Flestir stjúpforeldrar ætla sér ekki að koma í stað kynforeldra.

• Það er yfirleitt misskilningur að upplifa sig í samkeppni við stjúpforeldrið eða stjúpsystkin um athygli á heimilinu.

• Mikilvægast er að tala um það hvernig manni líður — líka við stjúpforeldrið.

• Fullorðna fólkið ber ábyrgðina á því að þetta gangi allt saman upp.

• Vandamál milli maka, fyrrverandi og núverandi, eru ekki börnunum að kenna. Þau verða þeir fullorðnu að leysa sín á milli og vissulega ber þeim að hafa velferð barns/barna sinna í fyrirrúmi í þessu ferli.

• Það er því nauðsynlegt að allir í fjölskyldunni reyni að vinna saman og vera kurteisir og tillitssamir til að svona stór breyting gangi vel fyrir sig.

Meiri upplýsingar
Á heimasíðunni Stjúptengsl er að finna mjög gagnlegar upplýsingar um stjúpfjölskyldur og þær áskoranir sem fylgja stofnun þeirra.  Barnasíða stjúptengsla  er með mjög góð ráð fyrir börn og unglinga sem eru orðin hluti af stjúpfjölskyldu.  

Aðstoð í boði
Ef þér líður illa vegna nýrra sambanda foreldra þinna er yfirleitt best að ræða við einhvern sem þú treystir, t.d. foreldra, stjúpforeldra, fósturforeldra, afa, ömmur, frændfólk eða vin/vinkonu. Ef þér finnst það erfitt eða finnst að enginn hlusti á þig getur þú leitað til eftirtalinna aðila:

Fjölskylduráðgjöf sveitarfélaga
Mörg sveitarfélög bjóða íbúum sínum upp á fjölskylduráðgjöf. Þangað geta börn leitað til að ræða og fá lausn á vandamálum sínum. Hér er listi yfir öll sveitarfélög landsins. Með því að smella á sveitarfélagið þitt kemst þú inn á heimasíðu þess. Hafðu samband við sveitarfélagið þitt til að fá upplýsingar um fjölskylduþjónustuna.

Heilsugæslustöðvar
Krakkar geta leitað til heilsugæslustöðvanna með alls konar spurningar og vandamál sem tengjast heilsu og líðan. Hérna er listi yfir allar heilsugæslustöðvar á landinu, heimasíður þeirra, netföng o.fl.

Kirkjan
Mörgum finnst gott að tala við sóknarprestinn sinn eða djákna um viðkvæm og persónuleg mál, enda eru þeir bundnir trúnaði. Hér er hægt að nálgast símanúmer allra presta landsins. Einnig er hægt að hafa samband við Fjölskylduþjónustu kirkjunnar sem er á Klapparstíg 25–27 í Reykjavík. Síminn er 562–3600.

Stjúptengsl 
Vefsíðan www.stjuptengsl.is er mjög góð síða fyrir fólk í stjúpfjölskyldum. Á síðunni er m.a. hægt að skoða reynslusögur, góð ráð o.fl. Umboðsmaður mælir sérstaklega með barnasíðu stjúptengsla.

Tótalráðgjöfin
Tótalráðgjöfin er ætluð ungu fólki sem vantar aðstoð og ráðgjöf fagfólks til að leysa úr alls kyns vandamálum. Hægt er að hringja í síma 520–4600, koma (í Hitt húsið, Pósthússtræti í Reykjavík) eða senda tölvupóst. Allar nánari upplýsingar er að finna á heimasíðunni www.totalradgjof.is.