... vinnur að hagsmunamálum barna almennt séð en ekki að málum einstakra barna
... leiðbeinir og gefur ráð hvert börn geta leitað til að ná fram rétti sínum
... kemur með ábendingar og tillögur til úrbóta sem snerta hag barna á öllum sviðum samfélagsins
... vill fá að vita hvað börn eru að hugsa og hvað þeim finnst um ýmsa hluti sem snerta þau og nánasta umhverfi þeirra
Afgreiðslutími er frá 9:00 til 15:00 alla virka daga
Ástvinamissir
Sorgin er hluti af lífinu
Gott að hafa í huga
Meiri upplýsingar
Aðstoð og ráðgjöf í boði
Sorgin er hluti af lífinu
Öll þurfum við, fyrr eða síðar, að kljást við sorgina og komast í gegnum hana. Börn og unglingar sem missa foreldri, systkini eða annan náinn ástvin bera þá lífsreynslu með sér alla tíð. Ungum börnum þarf e.t.v. að segja aftur og aftur að sá látni komi ekki aftur en um þriggja til fimm ára aldur fara börn að skilja hvað það þýðir að deyja. Börn og unglingar bregðast við missi ástvinar á mjög svipaðan hátt og fullorðnir þó þau noti stundum aðrar aðferðir til að tjá sig, t.d. leik. Þó að ástvinamissir sé ein erfiðasta lífsreynsla sem nokkur gengur í gegnum og söknuðurinn verði áfram til staðar er samt sem áður hægt að lifa með sorginni. Það verður auðveldara með tímanum.
Gott að hafa í huga
Hér eru nokkrir punktar sem gott er að hafa í huga þegar einhver nákominn fellur frá:
- Eðlileg viðbrögð við dauðsfalli eru t.d. sorg, reiði, efi, athyglisþörf, sektarkennd, ótti við að vera ein(n), svefntruflanir, lítil matarlyst, höfuð- og magaverkur, skjálfti og ógleði. Sumum líður eins og dauðsfallið hafi ekki átt sér stað en aðrir finna fyrir mikilli hræðslu við að missa fleiri ástvini.
- Börn og unglingar, sérstaklega þau sem eiga í erfiðleikum með að tjá sorg sína, geta upplifað þunglyndiseinkenni. Sum börn missa áhugann á námi, áhugamálum eða samveru með vinum eða fjölskyldu.
- Það er alveg eðlilegt að finnast hinn látni ástvinur enn þá hluti af tilverunni því þó að manneskjan sé dáin getur sambandið við hana „lifað áfram“. Mörg börn og unglingar sem missa ástvin þróa oft með sér betri aðferðir við að taka áföllum síðar meir í lífinu og eru oft þroskaðri en jafnaldrar þeirra. Önnur geta lent í sálrænum erfiðleikum síðar á lífsleiðinni.
- Í einstaka tilfellum fara börn og unglingar að kenna sjálfum sér um þegar einhver nákominn deyr. Mikilvægt er að leiðrétta þann misskilning.
- Barn eða unglingur sem misst hefur ástvin þarf að hafa greiðan aðgang að einhverjum sem veitir því öryggi, skjól og hlýju. Það þarf að eiga einhvern að sem hlustar.
- Þegar sorgin ber að dyrum er nauðsynlegt að fjölskyldan takist á við hana saman með því að tala saman, gráta saman, rifja upp saman og þiggja stuðning og umhyggju frá þeim sem manni þykir vænt um.
- Góðir vinir eða aðrir sem einnig hafa misst ástvin geta líka hjálpað þeim sem syrgja með ýmsum hætti.
- Miklu máli skiptir að gefa börnum og unglingum nægan tíma til að syrgja. Sumir virðast jafna sig fljótt, aðrir þurfa lengri tíma.
Meiri upplýsingar
Á síðu Rauða kross Íslands er undirsíðan Ef bara ég hefði vitað. Þar er fjallað um sálrænan stuðning fyrir unglinga. Smelltu hér til að lesa meira um áhrif andláts í fjölskyldunni.
Á síðunni www.missir.is er efnisorðalisti til að nota við leit að bókum sem geta hjálpað þeim sem hafa orðið fyrir ástvinamissi.
Hjálp í sorg á síðunni www.doktor.is er grein skrifuð til að hjálpa fólki í upphafi áfalls til að ná tökum á aðstæðum. Í greininni er fjallað um sorgarviðbrögð og uppbyggingu eftir áfall og ýmislegt fleira, t.d. bækur sem er gott að lesa. Önnur grein um sama efni er Sorgin snertir alla.
Á vefnum www.persona.is er undirsíða um áföll. Þar er m.a. að finna ýmsar góðar greinar.
Aðstoð og ráðgjöf í boði
Í sorg er yfirleitt best að ræða við einhvern sem þú treystir, t.d. foreldra, stjúpforeldra, fósturforeldra, afa, ömmur, frændfólk eða vin/vinkonu. Ef þér finnst það erfitt eða finnst að enginn hlusti á þig getur þú leitað til eftirtalinna aðila:
Fjölskylduráðgjöf sveitarfélaga
Mörg sveitarfélög bjóða íbúum sínum upp á fjölskylduráðgjöf. Þangað geta börn leitað til að ræða og fá lausn á vandamálum sínum. Hér er listi yfir öll sveitarfélög landsins. Með því að smella á sveitarfélagið þitt kemst þú inn á heimasíðu þess. Hafðu samband við sveitarfélagið þitt til að fá upplýsingar um fjölskylduþjónustuna.
Heilsugæslustöðvar
Krakkar geta leitað til heilsugæslustöðvanna með alls konar spurningar og vandamál sem tengjast heilsu og líðan. Hérna er listi yfir allar heilsugæslustöðvar á landinu, heimasíður þeirra, netföng o.fl.
Hjálparsími Rauða krossins, 1717
Hjálparsíminn 1717 er gjaldfrjáls og er opinn allan sólarhringinn fyrir þá sem þurfa aðstoð vegna depurðar, kvíða, þunglyndis eða sjálfsvígshugsana. Tilgangurinn með hjálparsíma Rauða krossins er að vera til staðar fyrir þá sem vilja þiggja aðstoð til að sjá tilgang með lífinu. Heimasíða Rauða krossins er www.redcross.is. Hér er að finna nánari upplýsingar um hjálparsímann.
Kirkjan
Mörgum finnst gott að tala við sóknarprestinn sinn eða djákna um viðkvæm og persónuleg mál, enda eru þeir bundnir trúnaði. Hér er hægt að nálgast símanúmer allra presta landsins. Einnig er hægt að hafa samband við Fjölskylduþjónustu kirkjunnar sem er á Klapparstíg 25–27 í Reykjavík. Síminn er 562–3600.
Ný dögun
Ný dögun eru samtök um sorg og sorgarviðbrögð. Samtökin eru öllum opin og þar er fólk sem veitir stuðning og ráðgjöf til þeirra sem hafa misst ástvin. Heimasíðan er www.sorg.is.
Starfsfólk skólans
Grunnskólanemar eiga að geta leitað til umsjónarkennara, námsráðgjafa og skólahjúkrunarfræðings með trúnaðarmál.
Tótalráðgjöfin
Tótalráðgjöfin er ætluð ungu fólki sem vantar aðstoð og ráðgjöf fagfólks til að leysa úr alls kyns vandamálum. Hægt er að hringja í síma 520–4600, koma (í Hitt húsið, Pósthússtræti í Reykjavík) eða senda tölvupóst. Allar nánari upplýsingar er að finna á heimasíðunni www.totalradgjof.is.
Prentvæn útgáfa
