Hver ræður hverju?
Yfirstjórn
Leikskólar
Grunnskólar
Upplýsingar og ábendingar
Yfirstjórn
Menntamálaráuneytið fer með yfirstjórn mennta-, æskulýðs- og menningarmála á Íslandi. Í ráðuneytinu eru m.a. samin lög um leikskóla, lög um grunnskóla og lög um framhaldsskóla. Lögin fara svo fyrir Alþingi og eru að lokum samþykkt þar af þingmönnum — stundum eftir einhverjar breytingar í meðförum þingsins. Svo eru samdar ýmsar reglugerðir á grundvelli laganna þar sem ákvæði laganna eru útfærð nánar. Menntamálaráðherra fer með yfirstjórn ráðuneytisins og ber ábyrgð á öllum stjórnarframkvæmdum þess. Menntamálaráðuneytið gefur út aðalnámskrár sem allir skólar verða að fara eftir.
Leikskólar
Fólkið sem við kjósum til að sitja í sveitarstjórnum (bæjarstjórn eða borgarstjórn) ræður hvort sveitarfélagið (bærinn eða borgin) býður íbúum sínum upp á leikskóla og þá hvernig leikskóla. Ef ákveðið er að bjóða upp á leikskóla verða þeir að starfa eftir lögum um leikskóla. Leikskólastjóri er æðsti yfirmaður hvers leikskóla. Næsta stig er skólaskrifstofan í sveitarfélaginu (Menntasvið í Reykjavík). Æðstu ábyrgð í sveitarfélaginu ber svo skólanefnd sveitarfélagsins (Menntaráð í Reykjavík) sem starfar í umboði sveitarstjórnar (bæjarstjórnar eða borgarstjórnar eftir því sem við á).
Grunnskólar
Sveitarfélögin eiga að halda skóla fyrir öll börn og unglinga á aldrinum 6 -16 ára eins og lög um grunnskóla segja til um. Allur rekstur almennra grunnskóla er á ábyrgð og kostnað sveitarfélaga og hafa sveitarfélögin nokkuð frelsi til að ráða sjálf hvernig þau skipuleggja kennslu og skólastarf. Skólastjóri er æðsti yfirmaður í hverjum skóla. Næsta stjórnsýslustig er skólaskrifstofan í sveitarfélaginu (Menntasvið í Reykjavík). Æðstu ábyrgð í sveitarfélaginu ber svo pólitískt kjörin skólanefnd sveitarfélagsins (Menntaráð í Reykjavík) sem starfar í umboði sveitarstjórnar (bæjarstjórnar eða borgarstjórnar eftir því sem við á).
Upplýsingar og ábendingar
Ef þig vantar almennar upplýsingar um grunnskóla, eða hefur ábendingar um eitthvað sem betur mætti fara í skólanum þínum, ættirðu að ræða um það, t.d. við umsjónarkennarann þinn, námsráðgjafann eða skólastjórann. Þú getur líka skrifað skólanefndinni í sveitarfélagi þínu bréf til að koma skoðunum þínum á framfæri. Flestir grunnskólar eru með heimasíðu þar sem hægt er að nálgast ýmsar upplýsingar varðandi skólastarf.
